2018/02/04 【跟隨基督】 鄭英兒 牧師
- 詳細內容
- 上層分類：日期檢索
- 點擊數：701
主日講道：
跟隨基督
經文：太四:12-23 講師︰鄭英兒 牧師
台灣基督長老教會1260間教會，有1間真特別的台灣公義行動教會佇2010年2月28日下埔2點28分佇台北228和平公園的228紀念館廣場舉行成立感恩禮拜，成立後每禮拜日下埔佇228公園內舉行野外禮拜，亻因無禮拜堂，亦無固定的座位，每遍禮拜前排塑膠椅，禮拜結束就收回，但是亻因每禮拜日平均參加禮拜人數已經30-40人，並且聘請鄭國忠牧師擔任亻因的牧者。2010年10月10日台灣公義行動教會受接納成做台灣基督長老教會台北中會北門教會支會，現今已經升格堂會是咱長老教會大家庭的一份子，亦是咱親密結連的肢體。後來台中中會亦成立公義行動教會佇台中公園。雖然沒禮拜堂，總是這2間教會的信徒亦真實學習跟隨基督的信仰！
今早起通過馬太4:12-22，咱相及學習跟隨基督的信仰課題：
-
堅信耶穌基督是人類生命的救主：
馬太4:12-17記載耶穌聽著施洗者約翰互人掠去，就去加利利，耶穌離開拿撒勒去住佇西布倫及拿弗他利地區，加利利湖邊的迦百農。接續15-16節特別引用以賽亞9:1-2來說明耶穌為什麼前往這個地區傳福音的原因：「西布倫的地，拿弗他利的地，沿海的路，約旦河東岸，外邦人的加利利，tiàm佇烏暗中的人有看見大光；tiàm 佇死蔭的地的有光照亻因。」加利利海一帶，包括西布倫及拿弗他利市原來以色列王國分裂做2國(北部以色列及南部的猶大)屬佇北國以色列的領土，但是主前721年北國以色列佇亞述帝國手中，對彼時開始已經7百多年受異族統治，直到耶穌的時代猶原接受羅馬帝國的統治。
道成肉體的耶穌基督，經過30年的準備，佇聖神帶領及引導中間來到迦百農及加利利地區，他宣講講：「著悔改，因為天國啲欲實現啦！」咱若對照馬可1:14-15按呢記載講：「約翰受掠了後，耶穌去 加利利宣揚上帝的福音，講：「時機到啊，上帝的主權啲欲實現啦，著悔改，信福音。」耶穌基督邀請人類接受「福音」(好消息「Good News)，就是上帝國(上帝的主權)已經臨到閣實現佇世界，特別是通過道成肉體的耶穌，互全世界人類經驗、體會、確信耶穌基督就是人類生命的救主，亦是舊約時代多多先知所預言的彌賽亞，耶穌親像光照佇黑暗中間，成做人類生命的盼望！
通過耶穌後來3年多的傳道生涯以及生命見證，包括耶穌的傳道(Preaching)、教示(Teaching)、醫治(Healing)、關懷(Caring)…，耶穌互咱人類深深體驗上帝國的福音就是：(1)真理的福音(約翰8:31-32，歌羅西1:5)。(2)救贖的福音(以弗所1:13)。(3)帶來永生的福音(約翰17:3)。(4)賞賜平安的福音(約翰14:27)。(5)充滿盼望的福音(歌羅西1:23，羅馬書5:1-5)。(6)充滿上帝應允的福音(以弗所3:6)。佇咱基督徒生活及生命，咱是呣是攏時時刻刻、實實在在經驗耶穌基督是咱生命的主，咱閣卡歡喜、肯定、堅持跟隨基督！
-
盡力成做生命得救的盼望：
馬太4:18-22記載耶穌開始傳道生涯以後，他呣是一直堅持單打獨鬥伊人王國的宣教模式，耶穌相信上帝國的建立需要團隊服事同心協力的方式，才有可能互上帝國日日得著廣闊！耶穌佇加利利湖邊開始建立宣教團隊，對掠魚人中間，耶穌連續呼召2對兄弟─西門彼得及安德烈，雅各及約翰，亻因4人攏隨時回應耶穌的呼召加入上帝國福音隊，放棄亻因
原來的工作及事業，開始投入上帝國的生命事業！
馬可1:16-20及路加5:1-11是及馬太4:18-22相關的記載；馬太及馬可的記載，耶穌看見彼得及安德烈佇湖裡啲拋網掠魚，耶穌對亻因講：「來隨我，我欲互恁得著人親像掠魚的得著魚。」亻因隨時將漁網放咧，去隨耶穌。雅各及約翰是及老父佇船頂啲整理漁網，耶穌呼召亻因，亻因就將船及老父放啲，去隨耶穌。雖然2對兄弟佇沒仝款的情景接受耶穌的呼召，但是亻因攏歡喜決志跟隨耶穌，開始學習參與上帝國的福音事業，盡力成做生命得救的盼望！若有機會參考路加5:1-11，咱欲看見西門彼得、雅各、約翰及其他掠魚人親自體驗耶穌是生命的主，當亻因掠沒魚的時，卻因為耶穌的緣故，亻因掠著的魚超過2隻船的量！西門彼得確認耶穌是人類的救世主，就跪落去佇耶穌的腳前講：「主啊，請離開我！我是一個有罪的人。」(路加5:8)但是耶穌呣那沒離開西門彼得，耶穌反轉邀請西門彼得及多多有罪的人加入祂的服事團隊，做伙打拚，盡力成做生命得救的盼望！耶穌基督今日親像呼召西門彼得、安德烈、雅各、約翰仝款啲呼召每一個人，期待咱時刻歡喜跟隨祂，共同打拚，做伙起造廣闊地上上帝國！
每年2月第3主日是總會所訂「原住民事工奉獻主日」，目前台灣基督長老教會1260間教會分屬23個中會及4個族群區會，其中有526間原住民教會分屬11個中會及4個族群區會，佔全體教會數42%。
全體教會信徒數25萬中間，原住民教會有7萬信徒佔27%。526間教會中間，53%的教會信徒數50人以下。台灣原住民教會面對主流社會的困境，原住民文化、母語、生活傳統攏面對危機，教會經濟困難，土地及傳統領域流失。
感謝上帝2017年總會原住民宣教委員會面對原住民城鄉變化及人口外流的挑戰中佇台南、新竹、雲林及彰化成立4間都會區原住民教會。請咱繼續關心支持總會原住民宣教委員會的傳道、宣教、文化、教育、人權、急難救助、產業發展、都會區教會開拓……等事工，亦為所需要的經費做伙參與奉獻，互原住民教會佇台灣原住民族人中間真正成做「盼望的記號」，將上帝賞賜的平安及喜樂成做亻因的應允及祝福。