2018/01/07【恩典與祝福】鄭英兒 牧師
- 詳細內容
- 上層分類：日期檢索
- 點擊數：1025
《主日講章》
恩典與祝福
經文：民六：22-27 講師︰鄭英兒 牧師
最近幾年全世界真多國家的首都或大都市攏有舉辦特別的「跨年」活動，尤其互相競爭設計多樣化的「煙火」，呣那比較經費，亦比較煙火時間的長短。台北市101大樓這幾年亦佇跨年的時放煙火慶祝新年的來臨，大家相招做伙欣賞101大樓的煙火，亦彼此祝福新年快樂！40歲以下的青年人及少年人比較卡有熱情參加跨年慶祝活動，甚至有真多人到花蓮、台東、墾丁或是阿里山，期待佇清早看到2018年透早的太陽(第一道曙光)。參加跨年活動的人，心內攏佇期待新的一年有新的盼望及開始，所以將過去一年的甘苦、不如意成做歷史的過去，帶著盼望進入新年！
最近幾年亦有教會舉行跨年祈禱會，用感恩的心來到上帝的面前，亦懇求上帝施恩賜福佇新的一年。今早起咱所讀民數記6:22-27，咱看見耶和華上帝的名祝福人民，互上帝國的子民時刻生活佇恩典及祝福中！
一、咱著充滿感謝算數上帝的恩典及祝福：
民6:24-26公式化的祝福用語是亞倫(摩西的兄哥)所講，上帝特別揀選亞倫及他的子兒擔任祭司的工作(民3:1-4)，上帝閣分派利未人協助會幕內服事的工作(民3:5-10)；祭司的職務一方面代表以色列人向上帝祈求祝福，另外一方面祭司亦因為上帝揀選閣設立的特殊身份向以色列人顯明上帝的祝福。舊約以色列人若提起耶和華的名，就表示耶和華真正親自降臨並展現祂的權能，以色列人著充滿敬畏的心來使用耶和華的名，祈求祂臨到上帝子民中間，並懇求祂的權能顯現。
民6:24-26祭司用三行詩的方式，奉耶和華的名祝福以色列人：每一行分做2部 份，第一部份是請求、呼籲耶和華上帝親自對祂的百姓有所行動，第二部份是說明祈福的內容及事實。
24節『願耶和華賜福你，保護你。』(現代中文譯本：願上主賜福給你『bless you』，保護你『take care of you』)上帝保護以色列百姓沒受對敵侵害及苦難。
25節「願耶和華互伊的面的光照你，施恩互你。」(現代中文譯本：願上主以慈愛待你『be kind』，施恩給你『gracious to you』)上帝賞賜恩惠互以色列百姓，表明祂用疼心及仁慈來對待軟弱、失志及失敗的人。
26節「願耶和華歡喜的面看你，賞賜你平安。」(現代中文譯本：「願上主看顧你『look on you with favour』，賜平安給你『give you peace』。」上帝賞賜以色列人百姓的平安，是日常生活實實在在的祝福，是每一位及上帝建立親密和諧關係的人攏會體驗著的生命實況。
以色列百姓成做「上帝的子民」，亻因 領受祭司的祝福，經驗上帝的同在及無盡的祝福。咱成做21世紀倚起佇台灣的基督徒，雖然過去咱有面對個人、家庭、國家、社會多多的艱苦、目屎及危機；但是咱閣卡需要學習充滿感謝算數上帝的恩典及祝福！親像聖詩593首「抵著試煉、災禍圍你真艱苦」的副歌按呢告白講：「主的恩賜你著算著數，主的恩賜你豈算會了？主的恩賜逐項算來記，穩當滿心感謝上帝大慈悲。」
二、咱著委身服事回應上帝的恩典及祝福：
民6:27耶和華講：「按呢亻因 欲用我的名下佇以色列人的頂面；我也欲賜福亻因。」(現代中文譯本：上主說：「如果他們奉我的名祝福以色列人，我就賜福給他們。」)聖經學者解釋這句話有2種可能的信仰提醒：(1)祭司盡忠佇他的職份，通過他的服事，引導以色列子民及上帝建立真實生命關係，上帝呣那祝福每一位祭司，亦欲祝福每一位忠實跟隨祂的以色列人。(2)上帝揀選以色列民族互亻因 體驗上帝的救恩，上帝賜福以色列人，期待亻因 分享上帝的疼痛及恩典，互萬民得到福氣。親像創世記12:3耶和華上帝對亞伯拉罕講：「地上萬族欲因為你得著福氣。」今日咱每一位跟隨耶穌基督的人咱親身體驗耶穌通過十字架的救恩，賞賜互咱重頭生閣復活的生命，閣佇咱的生活實況經歷上帝無盡的恩典及賜福(親像民6:24-26仝款)，咱著佇充滿感謝的中間閣卡決志、委身通過咱的服事來回應上帝的恩典及賜福！服事呣只是理念上、口頭上、意識上的認知，服事是通過咱生命的實踐及關懷來祝福萬民！
2018年1-3月咱台灣基督長老教會新眼光讀經運動的主題是「永恆的眼光」，尤其是1月1日-2月15日舊曆新年前咱做伙研讀約伯記，互咱再次共同面對及思考「苦難」佇基督徒人生及生命的信仰課題！
聖詩608首「奇妙恩典何等甘甜」是世界真出名的聖詩「Amazing Grace」(奇異恩典)，以及315首「天父恩典真正大」攏提醒咱上帝無盡的恩典及祝福日日時刻啲引導咱基督徒的天路歷程。咱歡喜欲佇新的1年開始，重新告白親像詩篇16:11「祢會指示我生命的道路，佇祢面前我有滿滿的歡喜；佇祢正旁我有永遠的快樂！」咱亦決志閣卡欲同心合一做伙努力實踐2018-2019年總會的年度主題「相愛連結肢體，生命見證基督」。
台語漢字版
22耶和華吩咐摩西講：
23「你著吩咐亞倫及伊的子講：恁著按呢給以色列人祝福，對IN講：
24『願耶和華賜福你，保護你。
25願耶和華互伊的面的光照你，施恩互你。
26願耶和華歡喜的面看你，賞賜你平安。』
27按呢IN欲用我的名下佇以色列人的頂面；我也欲賜福IN。」
現代中文譯本
6:22 上主命令摩西，
6:23 要吩咐亞倫和他的兒子們用下面的話祝福以色列人：
6:24 願上主賜福給你，保護你；
6:25 願上主以慈愛待你，施恩給你；
6:26 願上主看顧你，賜平安給你。
6:27 上主說：「如果他們奉我的名祝福以色列人，我就賜福給他們。」