2017/7/02【盼望的見證】鄭英兒牧師
- 詳細內容
- 上層分類：日期檢索
- 點擊數：758
《主日講章》 盼望的見證
經文：以賽亞書四十三:1-12 講師︰鄭英兒 牧師
今年是台灣基督長老教會宣教152週年的重要時刻，為配合2015年慶祝台灣基督長老教會宣教150週年，2014-2015總會主題：「福音釘根鄉里，教會活出盼望」！並制定2016-2017的總會主題：「同心合一學基督，謙卑服事做忠僕。」馬偕牧師所寫的聖詩「最後的住家」，每一遍吟唱互我深深受感動及激勵！馬偕告白他一生的歡喜及快樂攏佇台灣，馬偕歡喜將他的青春及人生攏總奉獻互他全心疼惜的台灣，馬偕佇他生命勿會當割離的台灣找到他人生的續尾站，台灣是馬偕一生疼惜最後的住家！馬偕佇台灣宣教的見證及腳跡，時刻邀請、鼓勵咱及他仝款成做盡忠的基督門徒！今早起咱通過以賽亞書43章1-13節做伙落實「盼望的見證」的信仰課題：
一、咱是上帝疼惜閣看做寶貝的生命：
聖經學者通常將以賽亞書40-46章稱做「第二以賽亞」，大概佇主前540年左右完成的。當時的歷史背景咱清楚南國猶大佇主前587年滅亡佇巴比倫帝國，有多多以色列人受掠離開故鄉以色列到巴比倫，以色列人面對滅國的悲慘及現實，亻因 呣知亻因 的未來佇叨位？亻因亦佇茫茫渺渺中間沒法度清楚、明白上帝的旨意及拯救！面對以色列人滅國的艱苦及困境，「第二以賽亞」特別宣講「主耶和華必然親像大權能者臨到，祂欲互受掠的以色列百姓得到自由，亦欲引導亻因 回歸亻因 的故鄉！
「第二以賽亞」亦一再提醒以色列人─亻因 是上帝所揀選的百姓，是上帝的奴僕(賽41:9)；親像賽43:1台語漢字版聖經：「雅各啊，創造你的耶和華，以色列啊，彼個造成你者，按呢講：你呣使驚！因為我救贖你。我曾叫你的名，召你，你是我的。」其中有四個動詞：「創造」、「造成」、「救贖」、「召喚」，一步一步強調上帝怎樣關心、疼惜以色列人，到佇第1節結尾清楚宣告講：你是我的(你是屬佇我的)！賽43:2說明上帝保護以色列人沒受水及火的傷害，賽43:3先知以賽亞閣用主前525年波斯征服埃及做背景來說明耶和華上帝確實是以色列神聖的上帝及救主，上帝願意付出任何代價，甚至付出最貴的贖價亦甘願，為著欲拯救以色列百姓。所以賽43:4上帝講：「因為我看你做寶貝，做尊貴；閣因為我疼你，所以我互人替你，互列國的人替你的生命。」先知以賽亞明確宣告上帝對以色列人的疼，呣那創造亻因，救贖亻因 ，看重亻因，看做寶貝，疼亻因，願意用任何代價來贖回、拯救以色列百姓！雖然以色列人面對滅國、滅族的危機，但是上帝繼續疼惜亻因，看亻因 做寶貝，上帝通過祂的應允及拯救，表達祂對「上帝國的子民」永遠沒改變的「疼痛及恩典」！
上帝呣那疼惜以色列人，上帝仝款疼惜世間每一個祂創造的生命，關心每一個上帝國子民，看亻因 做寶貝，用祂沒時沒刻的同在及同行引導咱人生及生命一點一滴、一線一面的學習及成長！
長老宗的開創者加爾文，他所寫的聖詩「我來朝見你，救贖我的主」互咱清楚體會他的信仰告白─佇第3節、第5節歌詞按呢告白：祢就是活命，我對祢生存。除去祢以外，別位無盼望；佇主的應允，所信無空空。求賜阮和平，安靜及確信；佇祢的氣力，互阮永堅心。」這亦是咱共同的信仰告白！
二、咱著盡力閣勇敢用生命見證盼望，榮神益人；
賽43:1-7除了第1節上帝講：「呣免驚，因為我救贖你，我曾叫你的明召你，你是我的。」第5節上帝第二遍講：「莫得驚，因為我及你相及佇啲；」耶和華上帝兩遍提醒閣勉勵以色列百姓，因為上帝疼惜亻因，救贖
亻因，時刻及亻因 同在，所以亻因 著勇敢、莫得驚。
賽43:5-7耶和華上帝對以色列百姓應允講：「莫得驚」，上帝欲對東西南北、地極、世界各角落引導以色列人及亻因 的後裔回歸到故鄉。耶和華上帝講：「見若用我的名來稱者，是我為著家己的榮光創造者。」上帝創造、揀選、拯救以色列人，呣那表明祂對以色列人的疼痛及恩典，閣卡期待及盼望以色列人的所做所行會見證盼望、榮光上帝，互萬民得到福氣！以賽亞書43章10節耶和華講：「恁是我的干證的，是我所揀的奴僕。」12節閣一遍講：「恁是我的干證。」上帝兩遍提醒閣要求所有的基督徒攏是上帝的干證！每一時代無論佇任何實況，咱成做「基督的門徒」一定著盡忠、打拚、勇敢用生命見證盼望，榮神益人。