2017/6/04【應允及盼望】鄭英兒牧師
- 詳細內容
- 上層分類：日期檢索
- 點擊數：751
《上週講章》
應允及盼望
經文：羅馬書八:22-30 講師︰鄭英兒 牧師
教會節期上重要是復活節，第二重要是聖神降臨節(五旬節)，根據使徒行傳二：1-42記載：「五旬節的日到，門徒攏聚集佇一所在。忽然有聲對天頂來，親像透大風，充滿亻因 啲坐的歸間厝。閣有親像分開的火舌對亻因出現，歇佇逐個人的頂面。亻因 攏受聖神充滿，照聖神互亻因 的才能開始講別種語言。」後來佇聖神引導中間發生3件真奇妙的事，亦通講是聖神的權能及賜福：
(1) 全世界各地方的本地話。致到耶路撒冷的人著驚講：「咱竟然聽著
亻因攏用咱的本地話講起上帝所做偉大的代誌。」(徒2:11)
(2) 使徒行傳2:14-41記載彼得佇聖神充滿及帶領下的講道帶來上帝拯救生命的信息、力量及盼望，所以領受彼得信息的人攏受感動並接受洗禮，人數大約3000人。
(3) 使徒行傳2:42記載：「聖神的充滿及帶領，引導耶路撒冷的基督徒全心領受使徒的教示，參與團契生活、擘餅、祈禱。」通講亻因通過聖神的權能及賜福開始漸漸建立耶穌基督的身軀─「有形具體的教會」。使徒行傳2:43-47有閣卡詳細記載當時聖神引導所建立的團契生活，這就是初代教會最原始的教會實況，亦是每一時代佇每一個沒仝款的族群、文化、語言、地區的教會共同學習的典範及目標！
今早起咱做伙領受上帝的話是記載佇羅馬書8:22-30，聖經學者研究保羅書信真清楚的結論是：羅馬書第8章是使徒保羅針對「聖神」信仰課題上清楚、上完全的分享、分析，甚至通講是保羅經歷聖神上寶貴的信仰見證！保羅並呣是欲解釋聖神是什麼，他關心的是「聖神的工作」，「聖神怎樣成做重要的力量」，互基督徒佇人生及生命的學習閣卡確信「聖神的應允及盼望」：
一、聖神是咱基督徒軟弱中的應允及扶持。
羅馬書8:1-2保羅非常確信按呢宣告：「按呢許個及基督耶穌結連的人就無受定罪。因為，通過基督耶穌彼個賜活命的聖神的法則已經有解放咱脫離罪及死的法則。」羅馬書8:9-10保羅繼續講：「既然上帝的神有亻店 佇恁內面，恁就呣是屬本性，是屬聖神。人若無基督的神就無屬基督。基督若亻店 佇恁內面，雖然恁的身軀因為罪死，上帝的神會互恁活，因為恁已經及上帝有合宜的關係。」
約翰福音14-16章耶穌4次(14:15-17，14:25-26，15:26-27，16:4B-15)應允賞賜聖神慰助者(現代台語譯本)保惠師(台語漢羅本)安慰者(紅皮漢羅版)。耶穌提醒當祂復活以後欲賞賜的聖神至少包括2種角色：
(1) 成做基督徒的激勵者、啟發者、幫助者、安慰者以及時刻同在的陪伴者。
(2) 真理的啟示者引導基督徒佇每日生活認識、確認、分享、見證上帝國的真理。耶穌應允聖神成做基督徒一生真實的生命慰助者！
羅馬書8:26-27保羅見證自己生命經歷的聖神經驗確信告白講：「親像按呢，咱軟弱的時聖神嘛有啲給咱扶持；因為咱呣知著按怎祈禱，呣拘聖神家己用話勿會當表達的吐氣替咱祈求。了解人內心的上帝明白聖神的意思，因為聖神照上帝的旨意替信徒祈求。」保羅深深體驗人類本性的自私及軟弱，佇咱艱苦、目屎、失志、絕望，沒法度確信上帝旨意的時，呣知怎樣及上帝心靈及生命溝通的時，聖神的權能及奇妙超越人類的有限、保守、扶持咱重新及上帝恢復親密的生命結連，引導咱謙卑、順服、委身成做上帝歡喜的兒女。
二、聖神壯膽咱、裝備咱、造就咱成做上帝盡忠的差用。
羅馬書8:28及30節保羅繼續提醒講：「咱知，萬項事互相運作，互許個疼上帝的人，就是照伊家己的旨意選召的，攏有利益。閣伊預先決定的人，伊嘛給亻因揀召；伊揀召的人，伊嘛給亻因宣判做義人；伊宣判做義人的，伊嘛互亻因得著榮光。」雖然對羅馬書8:28-30佇神學上及聖經學有「預定論」的爭論；但是對長老宗創始者加爾文牧師非常清楚的主張：「預定論」是提醒基督徒閣卡謙卑學習順服「上帝絕對的主權」，就是因為沒確信自己、別人、某人已經互上帝預定得救，咱閣卡積極傳福音分享基督的疼痛及普世的救恩，咱著盡力確信上帝託付的使命及責任，通過咱忠實順服並實踐上帝的旨意來榮光上帝，利益造福眾人！
約翰福音20:19-23耶穌復活的暗時，佇門徒驚惶呣知耶穌豈有復活的時，耶穌來到亻因中間，2遍對亻因 講：「願恁平安」互門徒確信耶穌已經復活的事實及真理。第2遍耶穌講「願恁平安！親像父有差我，我嘛差恁。」講煞，伊對亻因歕氣，講：「領受聖神！恁赦免什麼人的罪，亻因就得著赦免；恁無赦免什麼人的罪，亻因就無得著赦免。」耶穌賞賜聖神加添門徒的信心、勇氣及犧牲、受苦的決志，這是上帝通過耶穌的命令及差派，要求每一位跟隨基督的門徒攏通過聖神的同在及陪伴，引導咱時刻分享上帝國的疼痛、恩典、平安及喜樂！
使徒行傳1:7-9記載耶穌復活後升天的情形，(五旬節前10日)，耶穌最後吩咐門徒講：「父用家己的權柄決定的時間及機會，呣是恁通知的。呣拘聖神臨到恁的時，恁會得著能力，佇耶路撒冷，全猶太，及撒馬利亞，直到天邊海角為著我做見證。」耶穌講諸個話了後，亻因 啲看的時受接上天；有一片雲給伊接去，亻因就看勿會著。耶穌呣那佇復活的暗時賞賜聖神互門徒，閣佇祂升天進前閣一遍應允聖神的權能及氣力，壯膽
亻因，提醒亻因，命令亻因 著依靠聖神的同在佇全世界每一個角落成做上帝國的見證！後來佇五旬節咱及耶路撒冷的基督徒共同見證聖神降臨及聖神充滿的基督信仰，聖神佇每一時代，每一所在，每一位基督徒身上，攏欲壯膽咱、裝備咱、造就咱成做上帝盡忠的奴僕及差用，互地上的上帝國日日得到廣闊！