2017/5/07【生命的福氣】鄭英兒 牧師
- 詳細內容
- 上層分類：日期檢索
- 點擊數：901
《上週講章》
生命的福氣
經文：詩篇八十四篇 講師︰鄭英兒 牧師
今早起主日禮拜一開始咱吟唱聖詩303首「主我欲謳咾你」，是咱教會信徒真愛吟的一首聖詩，亦是我真愛吟的一首聖詩。3節的歌詞攏是咱真重要的信仰告白，第1節是盡心盡意謳咾主，第2節是盡心盡意真實疼主，第3節是盡心盡意服事主，因為咱欲報揚上帝奇妙大權能，歸榮光上帝聖名；閣咱對上帝已經確實尋著人生的喜樂，哈利路亞。雖然佇聖詩歸類是「普世子民的團契」中教會禮拜的謳咾感謝，總是每一遍吟唱這首聖詩，咱呣那是盡心盡意謳咾感謝上帝無比的疼痛及無盡的恩典，咱亦閣卡提醒自己怎樣盡心盡意真實疼主、服事上帝！
詩篇84篇是有關耶和華上帝殿院的詩篇中真媠的一篇，詩人通過前往錫安朝聖，渴慕耶和華上帝殿院的心意及信仰課題，閣一遍提醒咱、鼓勵咱通過渴慕、親近、信靠上帝經驗「生命的福氣」。
一、生命及上帝同在的喜樂
詩篇84:1-4詩人一開始就非常清楚告白：「上主─萬軍的統帥啊，你徛起的所在互人赫呢意愛！我戀慕上主的殿院到欲暈去！我的心神向永活的上帝歡喜唱歌。」(現代台語譯本)「上主─萬軍的統帥啊，我多麼愛慕你的居所！我多麼渴慕上主的殿宇！我用整個身心向永生的上帝歡呼歌唱。」(現代中文譯本)
詩人清楚上主的殿院是上帝徛起的所在，是充滿上帝的權能、疼痛、榮光的所在。詩人充滿期待、歡喜、渴慕欲前往上帝的殿院，甚至渴慕到欲暈去；詩人整個身心靈全生命欲佇上主的殿院歡喜、謳咾、感恩！作者的生命經歷，講勿會盡的體驗佇上主的殿院，因為及上帝同在充滿喜樂！所以詩人一遍閣一遍盼望、期待來到上帝的殿院真實見證及上帝同在的喜樂及平安！甚至雀鳥仔及燕仔亦會當佇上主殿院尋著厝及巢，連動物亦會當安穩自在佇上主的殿院。第4節詩人告白講：「徛起佇你的殿院的人真有福氣！亻因 稱讚你無煞！」各位兄弟姊妹，當咱今仔日來到新店教會─上主的殿院，亦是上帝通過耶穌基督十字架救贖做地基所建立的教會，咱是抱什麼心情及態度來親近上帝、豈呣是充滿渴慕的心來就近上帝？咱是呣是每一遍參加新店教會主日禮拜攏深刻體驗及上帝同在的喜樂及平安？
二、信心、氣力愈加添的見證：
詩篇84:5-7詩人按呢告白講：「對你得著氣力的人真有福氣！亻因 迫切愛上錫安山朝聖。亻因 經過的焦燥山谷攏變做泉源；秋雨降落，福氣滿滿。亻因 愈行愈有力，攏欲佇錫安朝見上帝。」(現代台語譯本) 「倚靠你獲得力量的人多麼有福啊！他們急切要往錫安山朝聖。他們經過乾旱谷，它就變成泉源地；秋雨沛降，谷中處處池塘。他們越走越有力氣，都要在錫安朝見至尊的上帝。」(現代中文譯本)
詩人親像朝聖者仝款，佇人生及生命邁向上帝的目標的過程，咱必然面對真多的困難、挑戰及考驗！前往耶路撒冷聖殿的路程通常需要經過「別加谷」，因為及「流目屎」的希伯來發音相近，真多聖經版本就將「別加谷」譯作「流目屎的山谷」，「別加谷」是沙漠曠旱的所在，總是信靠上主的緣故，上帝欲將沙漠變成充滿水泉的所在。真正信靠上帝的基督徒，面對人生及生命各種實況及困境，雖然有真多艱難、目屎及困苦，總是上帝是咱的倚靠、幫助及應允，咱愈信靠他，信心、氣力愈加添，咱的生命欲成做上帝國的見證！聖詩619首「咱向前行佇上帝的光」(We Are Marching In The Light Of God)是南非祖魯語的聖詩，真活潑喜樂，真確定將自己的人生及生命仰望上帝的榮光及引導，就會充滿「上帝國的見證」！1990年9月WSCF(世界學生基督徒聯盟)佇法國巴黎舉行五年一次的大會，當時我受推派擔任大會義工(Steward)，佇開會禮拜結束的時，各國的代表唱這首詩歌，對禮拜堂行出來到街路，每人有一條彩色帶(五色代表五大洲)，亦分5隊一面唱一面振動彩帶，真正感動人的場面，亦真實見證信靠上帝的信心、氣力愈加添！詩人為國家君王、領袖的祈禱(第8-9節)，確信上帝對國家、社會、同胞、人民的眷顧、疼惜同在及賜福！
三、敬虔、謙卑信靠上帝的平安：
詩篇84:10-12節詩人的結論告白講：「佇你的殿院亻店 一日，卡贏佇別位亻店 一千日！我寧可佇我上帝的厝顧門，嘛呣願亻店 佇邪惡的人的厝內。因為主上帝是日頭，是盾牌，伊互咱恩惠及光榮；伊呣曾留一項好物無互正直的人。上主─萬軍的統帥啊，信靠你的人真有福氣！」(現代台語譯本) 「在你的殿宇住一天勝過在別處住千日；我寧願在我上帝的居所看門，不願住在邪惡人的家裏。主上帝是太陽，是保護者；他給我們恩惠、光榮。他從不留下一樣美好的事物不賜給行為正直的人。上主─萬軍的統帥，信靠你的人多麼有福啊！」(現代中文譯本)
敬虔謙卑信靠上帝的人真正有福氣，因為亻因 學習生命時刻及上帝同在，亻因 閣卡確定、領受、順服上帝的旨意，亻因 謙卑、信靠上帝活出誠實、正直、喜樂閣平安的生命見證！