017/01/15【上帝國的實現】鄭英兒牧師
- 詳細內容
- 上層分類：日期檢索
- 點擊數：810
《主日講章》
上帝國的實現
經文：路加福音四:14-21 講師︰鄭英兒牧師
2001年印度大地震受災的人民，2004年12月26日「南亞大地震及海嘯」受苦的亞州人民，2008年1月「海地大地震」受災的人民(80%是天主教徒)，以及2011年3月11日日本東北大地震受苦地生命，亻因 攏有仝款的問題─上帝國在叨落？上帝為什麼按呢對待阮？上帝豈有看到阮的目屎及艱苦？面對世界這呢多苦難，咱基督徒怎樣回答這些問題及難題？
今早起咱做伙對路加福音4:14-21來學習上帝國的實現：
一、耶穌基督道成肉體的救贖及恩典建立地上上帝國：
路加福音4:14-15的記載描寫耶穌開始佇加利利傳道，這是接續路加4:1-13耶穌受試探以後，耶穌真真正正開始他傳道的生涯！現代台語譯本4:14-15「耶穌受聖神的權能充滿，轉去加利利。伊的名聲傳到四圍逐地區。伊佇逐個會堂教示人，受眾人尊敬。」路加記載的目的提醒咱：耶穌通過傳道的認證考試以後，他怎樣堅持對「道成肉體」出世來到世界的主要任務，就是關心世界人類的生命。雖然30歲以前他人生的主要經驗是佇家庭及生命成長的學習生涯，但是現今才是他人生真正使命及職責的開始！佇聖神的充滿、扶持及幫助的情境下，他佇加利利一帶每一個會堂教示人，受眾人尊敬。路加的記載表明耶穌傳道生涯開始造成積極正面的影響，所以耶穌的名聲遍傳加利利每一個地區。咱通想像耶穌通過他自己每日的生活及行為，他盡忠打拚表達上帝對生命的關心及疼惜，耶穌本身的生命見證互每一位面對他的人以及佇他周圍的人真真正正接觸、經驗上帝的疼！耶穌基督佇以色列人宗教、歷史、民族、受拯救的經驗基礎，繼續通過他自己的生命擴大，建立地上的上帝國！
二、上帝邀請咱用信心及見證做伙起造地上上帝國：
路加4:16-21互咱看見耶穌轉去故鄉，照習慣佇安息日前往會堂，有人交互他先知以賽亞的冊，他就掀開讀出61:1-2「主的神臨到我；因為祂用油抹我，互我傳好消息互散赤人，祂差派我宣佈：受掠的得著解放，沒看見的閣看見，受壓制的得著自由。宣佈主恩惠的年。」(現代台語譯本)會堂內面的眾人注目看耶穌，耶穌就對亻因 講：「此段聖經，今仔日恁啲聽的時已經實現啦。」(路加4:21)
耶穌大膽、勇敢將自己及當時以色列的處境及實況相結連，耶穌一方面表明他是舊約的實現者(應證先知以賽亞的預言)，另外一方面閣卡重要的宣告：現在就是上帝拯救全世界人類的恩典時期，耶穌帶來全人類的新時代，充滿光明及希望的新時代！
耶穌引用以賽亞書61:1-2表明上帝國的救恩是分享主恩惠的年，並且互世界多多受苦的生命通得到關心、疼惜及祝福，耶穌確信上帝國的實現是通過真多付出、關懷、犧牲、受苦的參與及過程才有可能經驗真正的恩典及疼痛！所以成做上帝國的子民，上帝並無答應咱勿會面對困難、無碰到生死病痛，呣免經驗艱苦及目屎，但是上寶貝的是上帝時時刻刻及咱同在，及咱同行人生的每一路站及過程。咱基督徒著主動、積極分享這種生命的見證，邀請閣卡多人做伙分享上帝國的恩典及疼痛！
基督徒真正重要的信仰課題，當咱人生面對艱難及困苦，尤其是自己及親人朋友生命的死失及病痛，咱呣是祈禱上帝改變咱生命的現況，咱閣卡重要是懇求上帝改變咱面對生命及實況的態度！基督信仰的「重要性」就是提醒幫助基督徒通過「生命經驗」的挑戰及困境來改變並建立上帝所歡喜的價值觀及生命觀！
2017年1月16日是今年美國的「馬丁路德金恩日」(1986年起每年1月第3個禮拜一)，呼籲美國人民紀念馬丁路德金恩牧師對美國黑人民權運動的犧牲及奉獻，雖然39歲受暗殺安息，總是他的生命見證及打拚，真真正正擴大上帝國的實現，將上帝的疼痛及恩典臨到閣卡多受苦受難的生命！