2009/04/26 【建立疼、甜蜜的教會】 石雅芳傳道
- 詳細內容
- 上層分類：日期檢索
- 點擊數：1109
主日講台：建立疼、甜蜜的教會 石雅芳傳道 哥林多前書3:10-15
2009/04/26
建立疼與甜蜜的教會是咱教會打拼的目標，也是咱努力的方向，咱教會的異之一就是建立「充滿愛的感覺記憶的教會」若是達到這個目標，咱可來思考會咱會可安怎做?
一、咱需要有擱卡多的互相接納，彼此欣賞
在我參加幾擺的國際會議，深深體會到世界各國會員，來自不同國家，不同民族，不同教派，不同教會，不論殷的背景怎樣，大家有一個共同的目標就是盼望，上帝國可以早一日行在地裡親像在天裡，所以不分彼此，大家互相接納，彼此欣賞來同心興起上帝的事工，這樣的彼此接納，彼此欣賞，是一件真美的代誌，也是做上帝的事工的基本要件。咱的教會是一個肢體，在服事當中，每一個人對事的看法，做事的方法攏不同款，咱若是可以互相接納、彼此鼓勵，教會做工的人一定真多，做工的氣氛也一定真好。世界真大的基督教組織，這些成員的差異性是更加擱卡大，總是為著要興起上帝的工程，攏可以放下自己的自我意識，為著大局來設想，咱教會裡面的兄弟姐妹，也一定可以互相體貼，彼此接納，彼此欣賞，快樂歡喜同齊來為主做工的。
二、咱著要嘴甜、面甜、心甜
戀愛中的男女總是會真快樂，心中充滿甜蜜的感覺，所講出來的話攏是溫柔體貼，充滿甜言蜜語，愛情可以帶來給咱甜蜜快樂的感受，信仰更加是可以為咱帶來擱甲多的喜樂與甜蜜。當咱從主耶穌領受豐盛的疼，那種的疼甚至是一般世間人所無法度給咱的，那種的甜蜜甚至是比在戀愛中男女更加快樂的。因為當咱若與主耶穌越親密，咱的心中也就越會充滿甜蜜，咱就會常常有喜樂的笑容，所講的話可以造就人，勉勵人，安慰人。信主耶穌是一件非常快樂的代誌，因為當咱從主耶穌那領受豐盛的恩典，天父上帝那領受豐盛的疼痛，咱的心中是充滿疼，充滿甜蜜的，所以咱要將這呢的疼，這呢甜蜜分享出去，分享給擱卡多人。咱可以想像，當咱若來教會看著每一個人攏是嘴甜、面甜、心甜，這樣的氣氛會真吸引咱，咱會真想要一直佇這個所在，因為惦佇在是一種的享受，一種的快樂。
三、不只顧自己的事，也著顧別人的事
腓立比書2:4-5這呢講：「恁逐人莫得顧自己的事，也著顧別人的事，恁著有基督耶穌的心做心。」最近咱教會聚會的會友增加很多，也有多多新的會友，很需要咱來關心殷，小組就可以發揮好的功能。小組關懷的層面是可以擱卡深入，透過小組會友的關心，讓咱的兄弟姐妹真正可以感受這是一個疼的大團契。我認識一位彩虹媽媽的同工，在殷兜她是第一的信的，後來她帶領她的媽媽來信，佇幾禮拜前，她的媽媽過世，教會的小組發揮最大的功能，不只佇處理後事的過程中，一直陪伴她，幫助她，在最後的告別禮拜中，更加是全體動員來支持她，成功做了一場真溫暖，成功的佈道會。這讓她的其他的親人在這場的告別禮拜中，掃除了對死的驚煌與無盼望，在前禮拜，這位姐妹真高興也真安慰與我分享講，她的媽媽的告別禮拜了後，她的親人有去教會，現在她的爸爸與姐姐也攏固定會去教會，她感覺真安慰，也真感謝上帝的恩典。
今仔日的經文給咱講，保羅講伊親像一個有智慧的師傅頭，在建造傳福音的大工程當中，伊是那個做第一步，也是真重要的一步，就是將地基起造佇耶穌基督。也就是講保羅除了傳耶穌基督和他釘十字架的事以外，保羅不傳別的福音。也咱也攏真清楚，耶穌基督以及十字架的象徵，只有疼，因為上帝疼世間人，所以將祂的獨生聖子賞賜世間人，也因為基督耶穌疼世間人，所以願意順服父上帝的旨意，忍受痛苦被釘十字架頂。教會的地基是耶穌基督，佇教會裡面也只有將疼實踐出來，才可以講是將地基下在耶穌基督的身上。願上帝幫助咱，讓咱的相疼是用卡多的互相接納，彼此欣賞，擱用嘴甜、面甜、心甜來顯露耶穌基督賞賜咱滿滿的疼，最後也願咱不只顧自己的事，也著顧別人的事，讓咱是常常關心人，常常用疼人來實踐主耶穌的疼。願咱的教會是真正將咱的地基起造耶穌基督，也是起造佇疼的頂面，從這樣來建立一個有疼，充滿愛的感覺記憶的教會。