2008/11/23 【話語的氣力】 石雅芳傳道
- 詳細內容
- 上層分類：日期檢索
- 點擊數：1248
主日講台：話語的氣力 石雅芳傳道 民數記十四：26-28
2008/11/23
日本一位博士叫江本勝樣，在他所寫的一本書叫《生命的答案，水知道》。在他的這本書當中，記錄著他所做的一個真神奇的實驗：他將水分好幾組，讓各組的水接觸不同的字句，不同的話，聽不同的音樂，然後將這些的過程用高速的顯微攝影，結果各組的水所產生的結晶也非常的不同。比如講，他將水裝在一支水瓶，水瓶頂面貼「愛與感謝」等等好的話的時，水瓶裡面的水所展現的是真水的六角形的結晶。總是，水瓶頂面若是貼「混蛋」不好的話的時，那個水就會展現出扭曲真醜的形狀。對這樣，咱知樣，一般人認為無有任何意識的「水」，對「話語」都攏有這樣大，不同的反應，那這樣，對於靈性真高的人類來講，「話語」對咱人更加是有閣卡大的影響，甚至咱也可以講是「話語」氣力是真大的。
其實咱不難想像話語氣力，是會影響人與其他的生物與物質的，因為創造天地萬物與人類的主宰的上帝，起初就是用話來創造萬物的一切的。在創世紀第一章清楚講到，上帝講：「著有光」，就隨有光，日時與暗時就開始運行。所以從創世紀第一章咱可知樣，上帝是用祂的話來創造宇宙萬物的，上帝講什麼，代誌就會照這呢來成就。咱人所講的話，雖然無法度與上帝相比平，總是，咱人是照上帝的形象所創造的，也有上帝所賞賜的智慧與氣力在這當中，所以，咱人所講的話也一定有相當的氣力在的。
箴言18:20-21節講到：「人講話的效果，會互伊的腹肚充滿，伊的嘴唇所出的，欲互伊飽足。生死的權在佇嘴舌，疼伊者，欲食伊的果子。」從這段的經文中，咱知樣從嘴裏面所講出來的話，好參像是種子，是會結出果子來的，會因為咱所講出來的話，會帶來祝福或是咒詛。根據心理學家的研究，講話在人的一生當中佔了2/3的比重，因為人在生活當中，大部份的代誌攏著要靠講話來完成。無論是工作，作生意或是與人的溝通攏著要靠講話，從這樣咱可以講，在講話頂面得勝，人生就得勝，總是，若是在講話頂面失敗，人生就會失敗。所以，咱若說好話，就可以過好的人生。
今仔日的經文，給咱一個真好的警醒。當以色列百姓從西乃經過曠野來到加低斯(Ka-te-su)，已經是真接近迦南的邊界的附近，迦南美地就在眼前，總是真可惜因為殷的不信，原本只需要十一天的路程，卻是要多繞足足多38年多的路程，以色列百姓不止小信，閣在講話頂面閣失錯，殷埋怨上帝，咒詛自己。最後，殷自食惡果，耶和華上帝也照殷所發出的怨言來處罰殷。
為著要窺探迦南地，耶和華讓摩西派12個探子去探迦南地，在這段故事的記載，咱看著這12個探子雖然看的是同一個所在，總是殷回報轉來的結果卻是大大不同款。一邊是約書亞與迦勒；另外一邊是其他的十個探子。十個探子轉來了後，殷向以色列人民報歹的消息講，迦南地果然是流乃與蜜的所在，總是那裡的人高強大罕，咱若到那裡，一定會死到真歹看。聽到這些的話百姓，就驚甲逼逼剎，開始發怨言，詛咒自己。殷直直講：「毋值著阮死佇埃及地，毋值著死佇此曠野。不如再轉回埃及吧!」這十個探子與以色列百姓所講的話攏是消極、負面、沒盼望的話。所以當耶和華上帝聽到這些話了後，祂所給殷的回應就是：「恁互我聽見的話，我欲照按呢款待恁。」雅各書三6節這呢講：舌就是火，佇咱百體中做不義的世界，拍垃墋(la-sam)通身軀，一生的行動對伊發火，伊家己的火是對地獄發。」所以，咱就要小意。因為講不好的話，負面的話，不只是會害著自己，也會影響著別人。總是另外一邊，除了這十個消極，講負面話的探子以外，閣有兩位有正面的態度，對耶和華充滿信心值得咱學習的探子，就是約書亞與迦勒。當殷窺探了迦南地了後，他的回報是這呢講的，民數記14:7-9 ：「阮所經過、偷看的地是極好的地。耶和華若歡喜咱，就欲導咱到彼個地，將地賞賜咱；彼個地是流奶及蜜的地。總是恁毋通背叛耶和華，也莫得驚彼所在的百姓；因為殷是做咱的食物，閣致蔭殷的已經離開殷。閣有耶和華及咱佇在，毋免驚殷。」約書亞與迦勒因為信靠耶和華，向百姓講出積極正面的話，也因為殷所講信心與正面的話語，所以在第一代出埃及的百姓中，除了約書亞與迦勒以外，無人可以進入迦南地。箴言13:2講：「人因為嘴所結的果子，欲享受福氣。」所以，咱所講的話實在是真重要，因為咱所講的話就好參像是佇種作一樣，咱若是撒落好的種子，就可以收成好的果子。咱一定要講好的話，按呢就可以為咱建造一個好的人生。咱應該講什麼種好的話呢?
第一、要講信心的話
信心的話是得勝的話。咱要時常講：「我相信上帝，我相信耶穌」，當咱常常這呢講的時，上帝就會常常與咱佇在，祂就會賞賜咱恩典。因為聖經羅馬書十9-10也有這呢講到：「咱若是用嘴認耶穌做主，用心來信上帝互耶穌對死人中起來，就可以得著救。因為人用心來信，致到得著義；用嘴承認，致到得著救。」約書亞與迦勒也因為有這呢的信心，所以殷對百姓講：「有耶和華及咱佇在，毋免驚。」確實，若是有耶和華與咱佇在，無論是行在黑暗中，或是在困難中，艱苦病痛中，咱就向耶和華上帝講：上帝啊，我相信你，你是我的幫助，有你與我佇在，我攏無免驚。
第二、要講正面的話
在咱的日常生活中，不知你甘有發現，若是碰到問題，咱第一個反應會講，糟了!慘阿!死啊!去了了阿!賣活等等這些負面的話，雖然問題可能不那呢嚴重，不過，就是會因為咱有負面消極的想法，所以所講出來的話，就會變成負面，這是真不好的想法。咱實在要去除負面的想法，讓負面的想法變成做正面積極的想法。當咱遇到問題的時，咱要講沒問題、我一定做會到、再試一擺、一定會變很好等等這些話，當咱若講這些正面的話的時，在不知不覺當中，咱就會生出勇氣，相時，因為咱所倚靠的是萬軍的耶和華，當咱仰望祂，將眼光放在祂的身上，祂亦會幫助咱，克服困難，解決問題。
第三、要講感謝的話
人生的路途不可能一帆風順，總是會遇到阿雜、困難、不如意、失敗的代誌，當咱若遇到這些代誌的時，就容易會講一些怨嘆，甚至是惡毒的話。總是，雖然這些怨言好參像是在對人講，結果是在對上帝講，就親像一句俗語所講「怨天尤人」。總是，咱也知，碰到代誌「怨天尤人」是不效的，因為在這當中，有可能是上帝要透過一些的代誌來磨練咱，試煉咱的心志的。約伯的故事咱真熟，當約伯遇到極大的試煉，他從頭到尾攏沒有埋怨，反倒是閣嘔咾感謝主。當約伯遇到極大試煉的時他講：「我螁裼出老母的胎，也欲螁裼倒去遐；耶和華賞賜，耶和華提去，著嘔咾耶和華的名。」所以無論咱在什麼種的境遇，攏要保守咱的心，保守咱的嘴，用感謝代替埋怨，當咱用感謝的心講感謝的話，試煉就會離開咱。約伯在他遇到大事煉的時，他保守他的心，保守他的嘴，所以耶和華上帝就閣卡假意他，結果約伯得的是上帝加倍的祝福。
第四、要講勉勵的話
帖撒羅尼迦前書4:14講：「兄弟啊，阮勸恁著警戒許個無法度者，安慰許個餒志者，扶持許個軟弱的，用寬容款待眾人。」要安慰或是講勉勵許個餒志者。常常一句勉勵人的話，會讓餒志，無信心的人得到信心。一個常常會曉鼓勵人的人，必定是一個充滿有疼心的人，也是會憐憫人的人，因為他知樣人的不足與軟弱，他願意用鼓勵的話來幫助他，讓人重新得到自信與剛強，甚至有可能會因為這樣改變一個人的一生。所以相信會鼓勵人的人，也必定會是一個讓上帝的疼充滿的人。
要會時時講好話，有時並不是一件簡單的代誌。聖經也甲咱講：「獨獨舌無人會,制壓，是無停歇的歹物，有死的毒滿滿」。所以咱要用上帝的話與用祈禱來控制咱的舌。盼望咱可以常常講信心的話、正面的話、感謝的話以及勉勵的話，從這樣可以在咱的信仰頂面活出基督徒美閣好的見證，也願上帝可以照咱所講好的話來祝福咱，讓咱有一個受祝福的人生。