2006/07/16 【耶和華是醫治你的】 許健仁傳道
- 詳細內容
- 上層分類：日期檢索
- 點擊數：1262
主日講台：耶和華是醫治你的 許健仁傳道 出埃及記15：22~27
2006/07/16
一、以色列百姓在曠野的遭遇
這段聖經節，是續接以色列百姓經過紅海，上帝將In，對追入In的埃及軍兵中，拯救出來了後，所抵著的，頭一個信心的考驗。In離開紅海，進入一個叫「書珥的曠野」，佇那個曠野中間，連續行三日的路程。聖經在此Ka咱講：「尋無水」。咱不知，曾有在曠野的經驗無。亦是講，咱對曠野是什麼款的情形，不知有清楚的認識無？佇曠野的環境，早晚溫度變化大，日時熱，暗時冷，這也是為什麼上帝佇日時用雲柱，暗時用火柱來引導以色列百姓的原因。‹-Nà 按呢，曠野也是一個充滿石頭、石盤的山區，無有什麼植物，Ti-Hia來生長。以色列百姓帶著In所有的傢伙，在真歹行的曠野，好親像用行路，真辛苦Ti-Hia Teh搬厝相款。In面對一個真現實的需要Kap問題；「無水」。不是無水通洗身軀，是無水通飲。咱住在都市，用自來水慣習的人，若是停水三工，無水通用，咱亦是唉唉叫，何況以色列百姓已經「佇曠野行三日，尋無水」。擱較悲哀的是，她們到了一個所在，名叫「瑪拉」，有找著水，卻未飲得；「因為水苦」。這種情形，就親像一個在海面頂，遇著沈船災難的人，漂浮在海面頂，嘴乾，想要飲水，看見四周圍攏是水，卻是苦鹹的海水，「未飲得」相款，華語有一句話按呢講：「望洋興嘆」。以色列百姓In明明看見、遇著會通解決In的需要kap問題的「水」，但是這個In所欠缺，所需要的水，卻是苦的。同款是水，卻是苦的，「未飲得」，無法度解決In的問題，滿足In的需要。
二、咱佇人生的遭遇
佇咱的人生中間，咱也是會通看見，相款的代誌。以色列百姓在曠野的遭遇，會通預表，活佇咱週圍的世間人，亦是咱基督徒家己。咱亦好親像常常行在人生的曠野中間。 咱若有機會去病院，咱的確會發現，病院生利上好，會通講不時攏客滿。佇咱的社會，有那麼多的人，In的身體欠安，In Teh搜尋健康的身體，卻尋不到。有多多人，雖罔In已經到佇病院，接受醫生的治療，好親像找到盼望，好親像In的需要，Tí-Bë得到解決。不過，In就親像以色列百姓遇著「苦水」相款，無法度Ti-Hia得著醫治。
續接，咱欲來看以色列百姓，In面對困境的反應是如何？
三、以色列百姓面對困境的反應
二十四節按呢講：In開始對摩西發怨言，講：「阮欲飲甚麼啊？」，意思是講，你導阮Kàu-Tì曠野欲作什麼啊？In抵著問題、困難的處理方式，就是「哀怨」發「怨言」，開始對摩西的帶領，產生疑問，不信任，Ti-Hia批評，gâu-gâu唸。佇聖經民數記有記載，以色列百姓的「埋怨」發「怨言」是一種「‹信」的態度，是惹上帝發受氣的主要原因之一。上帝常常因為In的「哀怨」發「怨言」，Ti-Hia大發受氣，欲刑罰In。所以，兄弟姐妹，咱要會記得，咱遇著問題、困境的時，咱不通Ti-Hia來「埋怨」、發「怨言」，因為這是一種，對上帝‹相信的態度，也是惹上帝發受氣的原因之一。親愛的兄弟姐妹，當你發現你得到醫生無法度醫治的病痛時，你如何面對及處理呢？
四、摩西面對困境的態度
下面咱要來看，摩西他如何來處理這款「現實的困境」；伊有叫以色列百姓Ti-Hia靠家己的能力辦法來挖古井，尋水源否？無。他無有用家己的智慧、聰明來處理這件代誌，反轉，他Ti-Hia來搜尋上帝，「求叫耶和華」上帝，將以色列百姓的需要、困境，帶到上帝的面前。耶和華上帝就指示他「一欉樹」，摩西遵照上帝所指示伊的去行，將Hi「欉樹」Hiat佇苦水中間，「水就變甘」甜了，問題得到解決了。摩西面對困境kap問題的態度，給咱一個真好的學習的模範；第一，他知影要來依靠上帝、搜尋上帝，他相信上帝會給他清楚的指示kap幫贊。第二，摩西對上帝所指示伊的話，伊有順服遵照去行；上帝如何講，他就如何行。「順服遵照去行」才是信心真實的表現，不是這耳聽，另外一耳出去。亦不是用伊的經驗，亦是理性知識Ti-Hia來判斷上帝的話，講：哪有這款的可能，ka這「欉樹」Hiat佇苦水中，水就會變甜。好親像Teh變魔術相款。對上帝的話，用咱有限的知識及理性，所做出的批評及判斷，亦是一種不信的表現。
結論：咱面對困境應有的態度
親愛的兄弟姐妹，在二十六節，按呢講：「你若致意聽耶和華──你的上帝的聲，閣行伊所看做合宜的事，留心聽伊的誡命，守伊一切的律例，就我互埃及人所抵著的破病，的確無互你抵著，因為我──耶和華是醫治你者。」。咱相信什麼重要嗎？咱有相信「耶和華是醫治咱者」嗎？咱若相信上帝的話，並且遵照去行，聖經在此應允咱，互咱「無抵著，埃及人所抵著的破病」。埃及人所抵著的破病是什麼呢？埃及人所抵著的破病，除了天災以外，主要是「瘟疫」，就是咱一般所瞭解的『流行病』，一種會傳染及普遍會抵著的病痛。咱現代所知的，譬如有各種「癌症」、「愛滋病」、「流行性感冒」、「sars」、「高血壓」等等都是。
設使咱無意中「抵著」「埃及人所抵著的破病」，醫生無法度醫治的重病，請咱要記得，這是上帝所給咱信心的考驗。聖經佇此清楚Kä咱講：伊是醫治咱的上帝，咱若願意來搜尋祂，「求叫」耶和華咱的上帝，「致意聽耶和華──咱的上帝的聲」，祂的確用祂的話指示咱，使咱能通脫離咱的困境，醫治咱的病症。「因為我──耶和華是醫治你者」。