2010/05/16 【隨主的人】鄭英兒 牧師
- 詳細內容
- 上層分類：日期檢索
- 點擊數：354
《主日講章》
隨主的人
經文：路加福音九：51-62 講師︰鄭英兒 牧師
聖詩611首「隨主的人有幸福」是我的爸爸鄭連德牧師上愛吟的聖詩，這首聖詩亦是真多基督徒共同的信仰告白及見證。副歌一遍閣一遍歡喜分享講：「會得快樂，隨主的人快樂，主的快樂無通比；心底趒跳大歡喜，擒住主呣通放離，就得快樂，永遠通得主快樂。」當咱每一遍吟這首詩，咱是呣是通過「信仰經驗」及「生命實況」，真正對咱心內歡歡喜喜告白「隨主的人有幸福」？尤其當咱自己及親人或是教會兄弟姐妹面對死失、病痛、艱苦、目屎的時，咱豈猶原歡喜告白：「隨主的人真幸福」？
今早起咱作伙研讀路加福音9章51-62節，路加寫作路加福音9章51節-19章27節的主題，是描寫耶穌成做彌賽亞向前行向耶路撒冷，欲建立上帝國，亦是上帝奴僕的國度。路加佇9章51節-19章28節總共8遍提起耶穌行向耶路撒冷的路上(9:51，9:53，13:22，13:33，17:11，18:31，19:11，19:28)，路加欲強調佇耶路撒冷發生一切的代誌，對耶穌的言行及教示有真大的影響。其中9:51-18:14有真多記載通講是路加福音特有的資料，大多數是有關「上帝國」的教示，欲互閣卡多人認識彌賽亞的身分，亦互大家明白上帝國度是通過受苦的奴僕才有可能建立。這位「受苦的奴僕」，亦欲成做「上帝國的君王」！對耶穌彌賽亞身分的確認，互咱呣那漸漸了解「上帝國的本質」，亦互咱閣卡清楚當怎樣來跟隨耶穌基督！
路加福音9:51-56耶穌責備學生雅各及約翰：欠缺憐憫的心及疼惜生命的精神，因為欲叫上帝降火毀滅沒歡迎耶穌的撒瑪利亞人的城鎮。耶穌真清楚宣告閣提醒，祂所欲建立的上帝國是「疼惜閣憐憫生命的國度」，沒可能亦沒應該用任何藉口來「毀滅生命」！咱亦著學習：沒論佇任何情境，咱攏沒應該要求上帝的權柄去「毀滅生命」，這呣是耶穌基督所建立「疼痛的上帝國」！
今早起咱對路加福音9章57-62節，做伙學習佇咱每日的生活及人生課題，咱怎樣成做上帝所歡喜「隨主的人」：
1.甘願犧牲、受苦，奉獻自己
路加福音9章57、58節記載耶穌面對一位欲隨祂的人，通講是真有決心欲隨耶穌的人，他對耶穌講：「你無論去叨位，我攏欲隨你。」但是耶穌對他講：「狐狸有空，空中的鳥有巢，不過人子連靠頭殼的所在都無。」耶穌欲提醒咱每一位決心跟隨祂的人，咱必須要覺悟，跟隨耶穌絕對沒機會享受榮華富貴，閣卡沒可能做大官、坐大位，顛倒是著清楚，跟隨耶穌需要甘願犧牲、受苦的態度，閣需要歡喜奉獻自己互上帝差用！願意犧牲、奉獻、受苦來跟隨耶穌基督的人才真正體會閣告白：「隨主的人真正幸福！」。
2.主動積極、歡喜服事上帝
路加福音9章59-60節記載耶穌主動邀請另外一個人來隨祂，這個人應講：「主啊，互我先轉去埋葬我的老父。」耶穌對祂講：「互死人去埋葬家己的死人
。不過，你著去宣講上帝國的福音。」耶穌為什麼這呢沒情沒義，看起來嘛真沒同情、憐憫的心，何況死人那有可能去埋葬死人呢？咱每一個人亦有自己對家庭的責任需要盡職扮演。耶穌用這個比喻是欲強調，當咱面對必須做選擇及決定的時陣，上帝國的使命及責任比任何其他代誌攏閣卡重要，所以耶穌期待咱主動、積極、歡喜分享上帝國的救恩，亦服事上帝，通互上帝國日日得到廣闊及擴展！
3.勇敢、堅持、盡忠跟隨主
路加福音9章61-62節記載閣有一人對耶穌講：「主啊，我欲隨你；不過互
我代先轉去厝裡及家內的人相辭。」耶穌對這個人講：「手按佇犁尾猶直直越頭看後面的人無適合上帝國。」咱人的意志時常沒法度堅持，咱的信心亦常常佇生活實況中間軟弱閣倒退，咱閣卡時常回顧過去多多英雄、多多成功、值得誇口的經歷，咱跟隨上帝的決心亦佇多多苦難、挑戰、試煉的中間搖來搖去。耶穌清楚咱人的軟弱及不足，常常會躊躇、影響咱隨祂的決心，所以耶穌提醒咱呣通手按佇犁尾閣越頭看後面，咱應該手按犁尾向前勇敢、堅持、盡職跟隨主耶穌！
2010年6月底台北電影節首映撥放「牽阮的手- Hand in Hand」（義光教會田朝明醫生及田孟淑長老夫婦的紀錄片），真多觀眾看見田朝明醫生夫婦參與台灣民主運動犧牲、受苦的打拚及生命見證，攏感動流目屎。田朝明醫生一生用生命堅持「台灣獨立」，他講：「我就是沒夠打拚，才沒互人掠去關！」佇田朝明醫生及田孟淑長老身上，我看到真真正正「隨主的人」。對的信仰見證，鼓勵咱做伙勇敢、堅持、盡忠跟隨主耶穌基督！
每年5月第3主日是咱台灣基督長老教會「玉山神學院奉獻主日」，請咱新店教會長執、兄姐共同為玉山神學院推動培養、造就台灣原住民牧者的神學教育關心、代禱，亦特別為需要的經費支持及奉獻。
特別思念2019年2月14日蒙主恩召的高俊明牧師，他擔任咱總會總幹事之前就擔任玉山神學院13年的院長，非常致意關心台灣原住民教會的宣教事工以及原住民牧者培養訓練的重要性。1977年8月16日咱台灣基督長老教會發表〈人權宣言〉，當時高俊明牧師及真多參與草擬宣言的牧長攏寫好自己的遺書。2017年3月前衛出版社出版《高俊明回憶錄——磨難苦杯下的信仰與實踐》，冊中第122頁咱看到高牧師毛筆字親筆寫的遺書，其中特別提到他的遺產一半贈送台灣基督長老教會總會，做為傳道、教育、保障人權、社會服務、教會行政等用途；互總會捐款中，其中一半捐互玉山神學院及山地教會。請咱大家跟隨高俊明牧師的腳步，繼續關心、支持玉山神學院，培養閣卡多忠實跟隨主的奴僕，起造台灣原住民教會，成做台灣原住民盼望的記號！
當全世界及台灣面對COVID-19疫情造成1億6千萬人確診，336萬人死亡的艱難、困苦、死失及目屎！願上帝通過真正「隨主的人」成做「生命盼望的記號」，分享基督信仰真實的平安及喜樂！